Addysg a Hyfforddiant Cychwynnol Athrawon yng Nghymru

Gellir dilyn y ddau gwrs BA (Addysg Gynradd) SAC naill ai drwy gyfrwng y Gymraeg neu’r Saesneg.

Mae Coleg y Drindod, Caerfyrddin yn un o’r sefydliadau mwyaf profiadol yng Nghymru o safbwynt Hyfforddiant Cychwynnol Athrawon. Caiff y Gyfadran Addysg a Hyfforddiant ei chydnabod fel canolfan genedlaethol ar gyfer datblygu a hyfforddi athrawon dwyieithog a dyma brif ddarparwr athrawon cynradd cyfrwng Cymraeg De Cymru. Cadarnhaodd adroddiad Estyn ar Safonau ac Ansawdd mewn Hyfforddiant Cychwynnol Athrawon bod y Coleg yn parhau i ddarparu cyrsiau hyfforddi athrawon sydd gyda’r gorau yng Nghymru.

Mae ystadegau cyflogaeth graddedigion yn galonogol dros ben a dangosant fod bron pob un o’r hyfforddeion cynradd ac uwchradd wedi sicrhau swydd addysgu o fewn chwe mis i orffen eu hyfforddiant.

Gweithia’r Coleg mewn partneriaeth a thros 250 o ysgolion cynradd a 45 o ysgolion uwchradd yn Ne Cymru.

Cyfranna’r Drindod at agenda Cynulliad Cenedlaethol Cymru ym maes addysg y blynyddoedd cynnar, dwyieithrwydd a datblygiad proffesiynol parhaus. Mae’r Coleg wedi’i ymrwymo i gefnogi datblygiad proffesiynol hyfforddeion ac athrawon cymwysedig, a chynigir ystod o gyrsiau mewn Addysg Anghenion Arbennig, Addysg y Blynyddoedd Cynnar, Rheolaeth, Addysg Amgylcheddol ac Astudiaethau Addysgu Proffesiynol.

Coleg y Drindod – Proffil

Mae Coleg y Drindod wedi’i leoli yng Nghaerfyrddin, canolfan fasnachol cymuned fawr a ffyniannus. Fel un o colegau o Fewn Prifysgol Cymru, cynigir gan Goleg y Drindod raglenni gradd israddedig ac ôl-raddedig y gellir eu dilyn yn llawn neu’n rhan amser.

Mae’r Coleg yn adnabyddus am ei naws gyfeillgar a chroesawgar ac ymfalchïa hefyd yn y profiadau byw a deinamig a gaiff myfyrwyr yn ystod eu cyfnod yno. Mae’r Coleg wedi’i ymrwymo i ddarparu addysg uwch sy’n berthnasol i anghenion y cymunedau a wasanaethir ganddo. Mae ganddo rôl allweddol fel prifysgol gymunedol sy’n cefnogi dwyieithrwydd a datblygiad cymunedol cynaliadwy.